ప్రదోష స్తోత్రం (Pradosha Stotram)
జయ దేవ జగన్నాథ జయ శంకర శాశ్వత ।
జయ సర్వసురాధ్యక్ష జయ సర్వసురార్చిత ॥1॥
జయ సర్వగుణాతీత జయ సర్వవరప్రద ॥
జయ నిత్య నిరాధార జయ విశ్వంభరావ్యయ ॥2॥
జయ విశ్వైకవంద్యేశ జయ నాగేంద్రభూషణ ।
జయ గౌరీపతే శంభో జయ చంద్రార్ధశేఖర ॥3॥
జయ కోఠ్యర్కసంకాశ జయానంతగుణాశ్రయ ।
జయ భద్ర విరూపాక్ష జయాచింత్య నిరంజన ॥4॥
జయ నాథ కృపాసింధో జయ భక్తార్తిభంజన ।
జయ దుస్తరసంసారసాగరోత్తారణ ప్రభో ॥5॥
ప్రసీద మే మహాదేవ సంసారార్తస్య ఖిద్యతః ।
సర్వపాపక్షయం కృత్వా రక్ష మాం పరమేశ్వర ॥6॥
మహాదారిద్ర్యమగ్నస్య మహాపాపహతస్య చ ।
మహాశోకనివిష్టస్య మహారోగాతురస్య చ ॥7॥
ఋణభారపరీతస్య దహ్యమానస్య కర్మభిః ।
గ్రహైఃప్రపీడ్యమానస్య ప్రసీద మమ శంకర ॥8॥
దరిద్రః ప్రార్థయేద్దేవం ప్రదోషే గిరిజాపతిం ।
అర్థాఢ్యో వాఽథ రాజా వా ప్రార్థయేద్దేవమీశ్వరం ॥9॥
దీర్ఘమాయుః సదారోగ్యం కోశవృద్ధిర్బలోన్నతిః ।
మమాస్తు నిత్యమానందః ప్రసాదాత్తవ శంకర ॥10॥
శత్రవః సంక్షయం యాంతు ప్రసీదంతు మమ ప్రజాః ।
నశ్యంతు దస్యవో రాష్ట్రే జనాః సంతు నిరాపదః ॥11॥
దుర్భిక్షమారిసంతాపాః శమం యాంతు మహీతలే ।
సర్వసస్యసమృద్ధిశ్చ భూయాత్సుఖమయా దిశః ॥12॥
ఏవమారాధయేద్దేవం పూజాంతే గిరిజాపతిం ।
బ్రాహ్మణాన్భోజయేత్ పశ్చాద్దక్షిణాభిశ్చ పూజయేత్ ॥13॥
సర్వపాపక్షయకరీ సర్వరోగనివారణీ ।
శివపూజా మయాఽఽఖ్యాతా సర్వాభీష్టఫలప్రదా ॥14॥
ఇతి ప్రదోషస్తోత్రం సంపూర్ణం ॥
